|
Piazza di luna
1989 - CELP - HM
PIAZZA DI LUNA
Ùn ti ne scurdà di l’acellu di luna chì canta dipoi cent’anni a listessa canzona.
Ùn ti ne scurdà di l’acellu di luna chì canta dipoi cent’anni a listessa stagione.
Cent’anni dighjà nant’à a piazza di luna.
A. Canavaggio
Retour
N°1 PIAZZA DI LUNA
In i tempi perniciosi, si sò affaccati i sgaiuffi, par fighjà quant’hè frusta a terra è quandu, pianu, pianu, a farfalla si mette sopra à e spalle d’i mantelli.
I mani sò in e stacche è facianu u passu è vene, i sgaiuffi, nant’à a piazza di luna.
A. Canavaggio
Retour
N°2 PIAZZA DI LUNA
Nant’à a piazza di luna, i sgaiuffi si riposanu inseme è i so ochji sò culore di scopa è i so bracci schietti stringhjenu e belle spalle.
Ghjocanu, i sgaiuffi, nant’à a piazza di luna, quandu si sdraganu à lu sole splendente è vanu à ciuttassi nudi in l’acqua di a funtana nera.
A. Canavaggio
Retour
ERAMU IN CAMPU
Eramu in campu
Di l’amore gradito
Duve fra i fiori
Circava più bello.
Eo sentava
Un falso grido
E mi sembrava
Che fussi un ocello.
Io guardai
Da duve vinia
E vidi fra i fiori
Dormire una dea.
Allor’ mi accostai
Col pie vacilente
Timido al cuore
La voce tremente.
Sappiate o bella
Che son’ cacciatore
Che gli ocelli
Fogiti li prendo.
Porto lo schioppo
Lo fischio e la rete
E prendo l’ocelli
Mia bella credete.
Posto che voi
L’ocelli prendeti
Potreste assanare
Le mie ferite.
Tradiziunale
Retour
N°3 PIAZZA DI LUNA
Mostranu a so legenda nant’à a piazza di luna è i so petti lisci cum’è risa di lupu.
Ma i frusteri fughjenu issu locu dulurosu è si fermanu soli, i sgaiuffi, perula senza ricchezza, cullana di silenziu, strascinendu i miasmi di a memoria, soli.
A. Canavaggio
Retour
N’ÙN TI SCURDÀ DI QUELLE STONDE
N’ùn ti scurdà di quelle stonde
Cantava l’acellu di luna
Rivucchendu listessu cantu
U tempu s’hè firmatu quì.
Tavagna / A. Jaume
Retour
N°4 PIAZZA DI LUNA
Nant’à a piazza di luna, u più bellu hè statu sceltu, u più bellu è u più forte ; si tene drittu, è cum’è un ramu di sangue, a tuntia d’amore vene è si ne và .
I sgaiuffi ridenu è fighjulanu, stantara è speranza.
A. Canavaggio
Retour
LETTERA À MAMMA
Mamma risponde nun possu
À e vostre dulente chjame.
Troppu miseria aghju à dossu
È mi si rode la fame.
Sò prigiuneru languente
In l’aria prussia à punente.
Venissi una rundinella
Ch’eo la mandi messagera
O venga puru una stella
À purtà la mio preghera.
Le mio pene è lu mio amore
Versu voi mamma d’amore.
V’abbracciu per lu penseru
Vi mandu sti versi soli
Dicendu sò prigiuneru
Chì tuttu què vi cunsoli
Mamma la vostra tristezza
À mè dà tanta amarezza.
Traditionnel
Retour
LAMENTU
Ch’ell’ùn fussi mai spuntatu
L’albore issa matina
A nutizia chì hà purtatu
O la mio trista ruina
U mio figliolu anu tombu
À Petrucciu u mio culombu.
U mio Petrucciu era un fiore
Prufumatu di bellezza
Giuvanottu di valore
Senza alcuna gattivezza
U so core era un mulinu
D’amore per u vicinu.
Quant’hè crudu lu dulore
Chì m’affanna è mi stringhje lu core
Quant’hè dura la mio sorte
A mio pena hè troppu forte
Brutta sterpa maladetta
Diu ferà a to vindetta.
Brutta sterpa maladetta
Diu ferà a to vindetta.
Tradiziunale.
Retour
N°5 PIAZZA DI LUNA
E sere fastidiose, si sentenu i lagni nant’à a piazza di luna, i sgaiuffi gridanu a so furia è a so passione : u più bellu si n’hè andatu spinseratu è felice è l’hà tutti mandati à spassu.
Hè partitu, disartore di u distinu per scunghjurà u tempu.
Hè fughjitu, cantellu di petra arrimbatu à lu ventu.
A. Canavaggio
Retour
N°6 PIAZZA DI LUNA
Nant’à a piazza di luna, i sgaiuffi stanu è stanu dinò, stanu à cunsumassi è à tribbulà u celu luminosu è chjaru.
Disgraziati chì chjamanu à l’addisperu, zitelli scrianzati è spaventati in mezu à un bastimentu chì dumanda forza è aiutu, viaghjadori senza viaghju, senza partenza è senza laziu per arruchjà un’ antra volta, a vita.
A. Canavaggio
Retour
N°7 PIAZZA DI LUNA
L’acqua hè dolce nant’à a piazza di luna, è numerosi sò i sgaiuffi chì sunnieghjanu à i vechji nivuli dubitosi è lesti, vulcani di coghju è di sudore.
Ma, d’inguernu, à mezanotte, si vede ciò chì l’anima ùn pò vede, quandu u sole, cum’è u mare, qualchì volta, strughje.
A. Canavaggio
Retour
N°8 PIAZZA DI LUNA
Nant’à a piazza di luna, u vaghjime ùn hà primura di u regnu di l’altagna.
À la punta di u ghjornu, stesi accantu à u muraglione, i sgaiuffi aspettanu sempre u marcante circataghju di dulori cù a so conca piena di lacrime vindute à l’appiattu.
A sera, u celu strigne cum’è l’ultima prigione.
A. Canavaggio
Retour
N°9 PIAZZA DI LUNA
Piazza di luna, i sgaiuffi pensanu à un rè cù u so stacciu in manu è a so cera piena di midaglie.
Pensanu à e notte ribelle senza sonnu è à u solcu di l’ancura chì ùn si pò lampà .
Pensanu à l’andaccianu vistu una volta.
Pensanu à issu campanaru chì avia a faccia nera di u distinu.
Pensanu u stu vechju amiragliu cù a so soma d’amore vintu.
Pensanu à u piacè, à la felicità amassi sempre.
Pensanu à l’uscere di u lindumane.
Pensanu à u palancatu chì piatta e so carezze.
Pensanu à la gioia, à la libertà , à la furtuna.
Pensanu à i fiori bianchi è à u celu neru.
Pensanu à u desideriu è à la disgrazia.
Piazza di luna, persi in i sonnii deliziosi, i sgaiuffi sentinu a musica culurita, pariculosa è murtale vinuta di una strada chì ùn esiste più.
A. Canavaggio
Retour
|
|
|